Areis | Ilass | Bargeld & Twint | Übernachtig | Verpflegig | Beschäftigung | Abküahla | Social Media
Areis
Kum doch mim ÖV! D’Umwelt seit Danka, wenn dr Karra dahei losch. Mitem Posti kusch bis «Churwalden Bergbahnen», vu döt durs Wäldli und noch ca. 10 min Fuassmarsch kusch zum Festivalgländ. Falls doch mim Auto kusch, kasches bim Gmainschaftsstall herastella.
Ilass
Ds Festivalgländ isch vum Fritig 18. August am 16:00 Uhr bis am Sunntig 20. August am 16:00 Uhr offa. Bim Hallo-Container kriagend iar eura Festival-Bändel und alli wichtiga Informationa. Bringen en amtlicha Uswis (ID, Fahruswis, etc.) mit, damit mer ds Ticket prüafa könnd.
(Fallser NIT drmit iverstanda sind, dass miar Fotis und Videos machen, wo iar könnten druff si, teilen üs das doch bitte bim Hallo-Zelt mit)
Ds Hallo-Zelt het wia folgt offa:
Fritig 18. August 2023: 16:00 – 19:00 Uhr
Samstig 19. August 2023: 11:00 – 18:00 Uhr
Fallser usserhalb vu dena Ziita areisend, döffender eu direkt ar Bar melda.
Bargeld, Twint & Karta
Miar hend alles!
GKB-TWINT wird am Samstig-Obig as Wartigsfenster ha und drum ziitwiis nid funktioniara, falls du mit TWINT bir GKB bisch.
Übernachtig
im Zelt
Campiara woma im Winter mit da Skii d Pista abafetzt, genau das kama bi üs! Es het gnuag Platz für jedi Form, Farb und Grössi vu Zelt, Hängematte und Bivak. En warma Schlofsack isch definitiv z’empfehla, miar sind immerhin 1’200 Meter über Meer.
im Camper
Miar bütend wenigi Plätz für Camper ah – das haisst, iar könnd au mitem Büssli zu üs ans Festival ko, jedoch kostet eu das Gspässli CHF 15 für beidi Nächt (wird direkt vor Ort ikassiart). Bitte meldend Eu im Vorus mit ma Mail an information.signatur@gmail.com , es gilt: dr Schneller isch dr Gschwinder.
Verpflegig
Gschiarr & Tüachli
Nochhaltigkeit ligt üs am Herza! Bringen doch eigets Gschiarr (Teller, Bsteck, Tassa & evtl. Abtröchnigstüachli) für dr Zmorga und dr Znacht mit. Am besta en tüüfa Teller (es git unter anderem Suppa). Miar büten kei Eiweg-Gschiarr ah. Abwäscha könnd iar ganz eifach ufem Festgländ. Wenn möchtisch döffsch gära au no dis eigeta Tupper mitneh – falls miar vorigs Essa hend, gebemer dr das sehr gära mit.
D Getränk gebemer in Becher vu cup&more ussa mit ma Depot vu 2 CHF/Becher.
Zmorga & Znacht
Zmorga und Znacht sind im Festivalticket wia folgt inbegriffa:
-2-tages Pass: Fr+Sa Znacht & Sa+So Zmorga
-1-tages Pass Fritig: Fr Znacht & Sa Zmorga
-1-tages Pass Samstig: Sa Znacht & So Zmorga
Iar könnd eu uf en super lokala, vegetarischa und selber kochta Gaumaschmaus freua.
Zmorga: 9:00 – 11:00 Uhr
Znacht: 19:15 – 20:45 Uhr
Zmittag
Dr Zmittag isch nit inklusiv und iar sind herzlich iglada eures eigena Essa mitzbringa oder eu a feini Portion Pommes Frites oder es Glacé für zwüschet dura bi üs z’kaufa. Es het a gmeinsami Grillstell, wo dörf selbstständig gnutzt werda. Drum bringen kei eigeni Kocher mit und machen kei eigeni Fürstella, es gilt Füürverbot!
Trinkwasser – es het en Brunna ufem Gländ, also kei Sorg – you’ll be hydrated!
Beschäftigung währendem Openair
D’Konzert fangen am 18:15 Uhr am Fritig und am 16:45 Uhr am Samstig ah – das heisst, viel Ziit vorher zum sich verwiila. Bringend Euri Liablingsspieli, Bäll, Farbstift, Seifablöterli, Ukuleles, Puzzli oder sustiga bruchbara Huusrot mit! Am Samstig-Nomittag, bevor üs d Musiker*inna widr verwöhnen, wirds no kli Programm geh womer zema üsi Hirnzella ahstrenga odr üs kli bewega könd – kasch also gspannt sii.
Abküahla oder Sprudla
Miar hoffen fescht, dass üs d Sunna während am fids mit ihrer Awesaheit beglückt. Churwalda het as Freibad – wenner Lust hend, könder euri Badsacha mitneh und eu döt für CHF 6 gu abküahla oder iar lönds eu guat goh im H2Lai woner für CHF 12 ins Hallabad oder CHF 30 zum Wellness go könnd. Da Heidsee (Lenzerheide) isch au n beliabta Ort zum sich im küahla Wasser erfrischa, as Glace gnüssa oder mit ma Pedalo dia Inseli z erkunda.
Meh Infos do: Freibad Churwalda, H2Lai Lenzerheide oder Heidsee (Lenzerheide)
Social Media
Miar werdend wärendem Festival regelmässig Informationa, Fötali und Videos über Social Media posta. Folg üs doch und blib ufem laufenda. Instagram
Gära döffsch üs bi dina Biiträg au markiara @fids.feschtindasteina oder dr #fids verwenda – das wär schampar kuuhl!