fids 2022
Drei Tääg, achtzehn Musiker*inna, sexafufzig freiwilligi Helfer*inna und rund hundersibzig Gäst – das isch z klii-Openair „fids – Fescht in da Steina“ in Churwalda gsi, wo vum 5.-7. August 2022 stattgfunda het. In fascht schu familiärem Rahma sind da Darbütiga vu da Künstler*inna us dr Region, wia am Mattiu, Head Smashed, ANATINA und Any Sabadi sowia au dena vum ferna Bern und dr Ostschwiz, wia Biandapid, Eutroopic und Too Mad glauscht worda. Ds Feschtgläänd wo vum Aug für z Detail und handwerklichem Gschickt vum Organisationskomitee zügt, het im Aschluss mit Barbetrieb und da beida DJs DJerry und DJ DoubleU2 im Sarasanai zum Verwila bis in dia früaha Morgastunda iglada. D Bsuacher*inna mit Zelt und Camper sind am Morga mit ma usgibiga Zmorga-Buffet mit lokala Produkt belohnt worda. Dia kulinarischa Höhepünkt sind aber dia gmainsama Z’Nächt gsi – as het Chilli Sin Carne und Älplermakkaroni geh – das het den natürlich au d Tanzbei für dia kommenda Konzert und Partynacht gstärkt. Mit ainazwanzig Liter selbergmachtem Ingwerer weniger, füfasibzig Blacha vum Party-Sarasani im Kofferuum, unzähliga guata Erinneriga und Gschichta sowia neua Fründschafta im Gepäck verabschieden miar üs bi eu! Bis ganz bald und machends guat – eures #fids-OK!
Meh vu ihna: Too Mad
Meh vu ihna: Eutropic
Meh vu ihna: Head Smashed
Meh vu ihna: Head Smashed
Meh vu ihna: Biandapid
Meh vu ihm: Mattiu Defuns
fids 2021
Dia ganz Wucha vorem Openair simmer am ufstella, bastla und dekoriara gsi damit mr am Fritig Nommitag, am 17.15 Uhr pünkltich mit dr ersta Band, mama’s B starta hend könna. Nocher hets a faina z’Nacht, wo ufem offna Füür kocht worda isch, geh. So hend alli wider gnuag Energie kah, zum Calandaboi & Everyboy und d Mirkwood Spiders live go luaga und abzdäänza. Im Aschluss het den dr DJ Cuche sini Liablingssongs ufglait und ma isch im Gian’s 24 h Party Zelt am abgoh gsi. Am nögsta Tag simmer den mitma ihaimischa z’Morga in da neu Tag gstartet und isch gmüatlich mitanand zemma ghöcklet und het Spieli gspielt. Am Nommitag isches den wider mit da nögsta Acts witer ganga. Zerst isch Jazz-Bouillabaisse uf dr Bühni gstanda und nocher isch dr Joel Perrin & Jachen Wehrli mit Poetry Slam dra gsi. Nochem zwaita unglaublich faina z’Nacht het Mischgewebe dia ganza Gäst zum tanza brocht und d Jamboree het mit ihrna Reggaemusik alli mitgrissa. Nocher isches wider mim DJ Cuche witerganga und alli hend bis in dia früaha Morgastunda tanzt.
As isch aifach unglaubglich gsi mit eu allna! Danka vielmol sinder koh und miar freuend us uuu fest, zum eu vum 5. – 7. August 2022 wider in Churwalda z’begrüassa döffa! Machends guat und stay fresh!
fids 2020
Au miar hend leider müassa uf Grund vur Pandemie z ersta Fescht in da Steina absega! Trotzdem hemmer üs üses fids20 nit wella neh loh!
Am Wuchanend wo aigentlich z allerersta fids in Churwalda stattfinda hetti sölla, hend miar vum OK nämlich nid aifach trurig dahai ummahöckla & Tüümli drülla wella, sondern hend dia Glegaheit gnutzt zum üs uf z’nögst Johr izstimma. Am Samstig Nommitag simmer zemma ufs Erdbeerfeld go 22kg faini 
-li pflücka, hend dr Stabmixer zum glüaha brocht und als Resultat 70 Gläser Konfi zauberet, wo den am nögstjöhriga fids bimna faina z‘Morga verputzt werda könn. Miar freuend üs jetzt schu u mega fest uf Nögstjohr
hebend eu sorg & bis bald!
